आदर्श साधकको-सम्झना मनिराज जोशी

        मेरा नजिकका स्वभावैले मिल्ने सदाचारी मित्र गोपालदत्त भटृ नेपाल राष्ट्र बैंकमा कार्यरत रहेदेखि नै निकट सम्बन्ध रह्यो । उहाँबाट हुने काम छिटोछरितो र स्पष्ट एबं भरपर्दो हुन्थ्यो । पछिल्ला केही वर्षदेखि उहाँ ॐ शान्तिका साधक भएर शाकाहारी, योग, प्राणायाम, ब्रह्मचिन्तनमा खुलेर लाग्नु भयो । नोकरीबाट अवकाश हुनुभएपछि वहाँ सार्वजनिक धार्मिक कार्यक्रममा पनि लगनशील भएर लाग्नु हुन्थ्यो । उहाँलाई हामीले सत्यवक्ता, सबैसंग मित्रवत् व्यवहार गर्न सिपालु र शान्त सौम्य साधकको रूपमा चिनेका थियौं । 

        केही वर्ष एल.एन. चोकमा उहाँले कपडाको पसल पनि चलाउनु भएको थियो । हामी उहाँका समकक्षीहरूको भेटघाट र भलाकुसारी गर्ने थलो उहाँको पसल हुने गर्थ्यो । बोली, भाषा, व्यवहार, विचार र खानपान समेत उहाँको साधककै थियो । उहाँको महाप्रयाणबाट हामी अति दुःखित  भएका छौं र एक असल मित्र र आदर्श साधक गुमाएका छौं । उहाँको शरीर विसर्जन भए पनि उहाँको उच्च विचार र उहाँको दिनचर्याबाट हामीले चरित्रवान, लगनशील, मेहनती, धार्मिक, आस्थावादी र असल गुण अंगिकार गर्न सक्दछौं । उहाँको दिव्यात्माले अव्यक्त निराकार तत्वमा लीन हुन सकोस्, हार्दिक  श्रद्धाञ्जली अर्पण गर्दछु ।

धनगढी, कैलाली