एक सज्जन पुरुष

            

एक सज्जन पुरुष

कल्यान ओझा, धरमापुर (कञ्चनपुर)

        लगभग दुई तीन पटकको भेटमा पनि मैले चिन्दै नचिनेका व्यक्तित्व हुन हुनुहुँदो रहेछ स्व. गोपालदत्त भट्ट । देखावटी फूर्तिफार्ति नभएका उहाँलाई मैले चिनेको रहेनछु । चिन्नैपर्ने व्यक्ति हुनुहुदोँ रहेछ स्व. गोपालदत्त भट्ट । उहाँ मेरा मित्र डा. पुष्करराज भट्टका पुज्य बुवा । एक पटकका भेटमा मित्रले नै बुबा भनेर परिचय गराएपछि बल्ल मैले उहाँलाई चिनेँ । पछिपछि त उहाँलाई देख्नेबितिकै मलाई लाज लागेर आउँथ्यो । थोरै बोल्ने, बिस्तारै बोल्ने कसैलाइ नदुख्ने गरी बोल्ने ॐ शान्तिको सेतो पहिरनमा रहिरहेको सम्झिन्छु । सायद ॐ शान्तिको कडा नियममा पनि रहिरहने एक सादा जिवनमा दिनचर्या व्यतित गर्ने व्यक्ति गोपालदत्त भट्ट अचानक स्वर्गीय भएको घटनाले मन अमिलो भयो । शायद एक महिनापछि मात्र थाहा पाएँ मैले । मान्छेको जातै हो, आफुले थाहा पाएको खबर भरसक अरुलाई नभन्ने । जे होस्, मन अमिलो भयो । गोपालदत्त भट्ट अब यस दुनियाँमा हुनुहुन्न भन्ने कुरा थाहा पाएपछि । उहाँको आत्माप्रति मेरो हार्दिक श्रद्धाञ्जली ।

        उहाँले आफ्नो जीवनकालमा ३५ वर्ष नेपाल राष्ट्र बैंकमा सेवा गरी अवकाश लिनुभएको रहेछ । स्वेच्छिक अवकाश लिने बेला उहाँ सहयक लेखा अधिकृतमा बहाल हुनुहुँदो रहेछ । उहाँले डडेल्धुरा, बैतडी एवं कैलालीमा नौकरीको अवधिमा सेवा गर्नुभएको थियो । उहाँ ॐ शान्ति, कैलालीको संस्थापक मध्ये एक हुनुहुन्छ ।

        परिवार जस्तै सम्बन्ध रहेका स्व. भट्ट यतिखेर मेरै छेउमा हुनुहुन्छ जस्तो लागिरहेछ मलाई । वि.सं. २००३ बैशाख १४ मा जन्मिएर वि.सं २०७७ श्रावण ८ गते धनगढीको सारथी अस्पतालमा स्वर्गीय भएका स्व.भट्टप्रति हार्दिक श्रद्धाञ्जली अर्पण गर्दै यी स्मरणका दुई शब्द विश्राम गर्दछु ।